【香港又點止一間KPMG】
畢馬威（KPMG）遲到扣錢事件被發酵，好多人將焦點放喺罰幾錢同埋勞工法例點計，但係最重要嘅一點反而係「KPMG旗下金融服務審計部其中一組，要求員工每日8:45AM前要打電話或send email向秘書報到，以證明人已在公司。」充分顯示呢一組嘅文化直情係唔信任員工，連打卡都驚你出老千，懷疑有同事請槍代打，所以一定要憑電話聽到聲，或者喺自己部電腦親手出email，咁先至承認你準時，似足啲江湖追殺令「生要見人，死要見屍」，究竟呢一組發生咩事呀? 當啲員工係賊定係犯人先?
最好笑係某報紙訪問啲人力資源經理，我竟然見到佢咁寫:「遲到罰款情況並不常見。」唔係啩? 我身邊有幾位朋友嘅公司都行呢種制度，肯定唔係「並不常見」囉，香港又點止一間KPMG呀? 大把公司都玩遲到罰錢，有啲係遲15至20分鐘就起錶計數，又或者會冇咗勤工獎，但OT又唔係由加班15至20分鐘開始起錶架喎，有啲加班冇錢，有啲就要做到夜晚8、9點先有補水，總之個龍門點擺，由老闆話事，一句講晒: 遲到要扣錢，OT咪講錢。
坦白講，準時返工係好合理，OT有時亦好難避免，僱主同僱員雙方都要協調，重點係如果set得個制度咁苛刻，只會搞到大家冇癮，做得唔開心，氣氛都唔慌好啦。
Search